Kırım muhacirlerinin Gelibolu Sancağında Batacık ve Sasan köylerine yerleştirilmeleri

Konu: Kırım muhacirlerinin Gelibolu Sancağında Batacık ve Sasan köylerine yerleştirilmeleri mümkün olmayınca. Edirne eyaleti Lüleburgaz ve Hayrabolu kazalarında münasib yerlere iskan teşebbüsleri ve en sonunda Bergos Kazası Beyaz ve Ahur Köylerine yerleştirilmeleri kararı…

Edirne Valisi Süleyman Paşa hazretlerine.

Kırım muhacirlerinden; 120 hane, 400 nüfusu mukaddemce li-ecli’l-iskan Gelibolu Sancağına sevk ve i’zâm olunmuş ise de henüz iskan ettirilmeyip, misafireten ikamet olunmakta olduklarından, liva-i mezkur dahilinde Batacık ve Sasan nam karyelerde ve olmadığı halde, Edirne eyaletinde Bergos ve Hayrabolu kazalarında bulunan hâlî ve münasip mahallerde iskan ve tavattunları hakkında, muhacirin-i merkumdan Hoca Feyzullah ve Abdurrahim efendiler tarafından mukaddem ve muahhar vuku bulan istidâ üzerine, muhacirin-i merkumenin münasip bir mahalde iskânları emrinde karar-ı ahire ve talimat-ı cedide ahkamına tevfikan ifa-yı muamele-i lazimeye himmet olunması makam-ı senaveriden bi’d-defâat iş’ar kılınmış ise de henüz icabı icrâ ve bir gune cevabı isrâ olunmadığından te’kidi hususu bu kere bâ-arzuhal istidâ olunmuş ve bunların iskanlarına elverişli olan Bergos’da Beyaz ve Ahur Karyeleri meraları, “âhârın taht-ı tasarrufundadır” deyu hilaf-ı vaki mahallinden iş’ar vuku bulması üzerine kendilerine cevap verilmiş ise de mezkur meralar kimsenin uhdesinde olmayan, hâlî mahal idüğü anlaşıldığı beyanıyla iktiza-yı halin icrasıyla, mezkur meralarda iskanları hususuna ruhsat itâsı istida kılınmış olduğuna ve zir-i cenah ü müstezimü’l-felah-ı cenâb-ı mülûkâneye dehalet eden bu mâkule aceze muhâcirinin bir an akdem iskanlarının icrasıyla istihsâl-i huzur ve rahatları esbabının istikmâli-i lâzimeden olduğu halde bunların şimdiye kadar iskan olunmamaları, doğrusu nâ-revâ göründüğüne binaen mukaddem ki iş’ar vechile bunların behemehal münasip bir mahalde iskanları zımnında iktizasının icrâ ve inhâsı hususuna himem-i behiyyeleri der-kâr buyurulmak siyâkında şukka.

Hicri: 21 Zilhicce 1277/ Miladi: 30 Haziran 1861

            Zeki Özkan, Mustafa Gultekin